Մանկաբարձական ծառայությունը ծավալվում է մասնաշենքի երրորդ և չորրորդ հարկերում՝ ներառելով ծնարանը և հետծննդյան հիվանդասենյակները։
Ծննդօգնությունը և հետծննդյան խնամքն իրականացվում են միջազգային չափորոշիչներին համապատասխան։ Անձնակազմը համալրված է բարձրակարգ, ծննդօգնության ոլորտում Հայաստանի առաջատար մանկաբարձ-գինեկոլոգներով, բանիմաց ու հոգատար միջին և կրտսեր բուժանձնակազմով, որոնք առավել ապահով, հաճելի և ցանկալի են դարձնում ծննդաբերող կանանց մայրանալու բերկրանքը։
Ծնարանը հագեցած է հղիի և պտղի ներարգանդային վիճակը գնահատող ժամանակակից սարքավորումներով։ Հետծննդյան հիվանդասենյակներում ստեղծված են մոր և նորածնի համատեղ կացության բոլոր պայմանները։
Հանդիսանալով երրորդ մակարդակի ծննդօգնություն իրականացնող բաժանմունք՝ 24/7 ռեժիմով, սպասարկում է ցանկացած բարդության և ծանրության ախտորոշում ունեցող հղի կանանց։
Մանկաբարձական բաժանմունքն իրականացնում է ծննդաբերների առաջնակի զննում, անհրաժեշտ հետազոտությունների իրականացում, ծննդաբերության ընթացքի վարում, ծննդալուծում կեսարյան հատման ճանապարհով, անհրաժեշտության դեպքում՝ հետծննդյան շրջանի խնամք և բուժում ողջ ծավալով, ներառյալ՝ նեղ մասնագետների խորհրդատվություն, հատուկ և դժվարամատչելի հետազոտությունների իրականացում և այլն։
Այստեղ մեր փորձառու մասնագետները մատուցում են հետևյալ ծառայություններն ու հիվանդությունների բուժումը․
- Նորմալ և բարդացած՝ 22-42 և ավելի շաբաթական ժամկետում, բնական ուղիներով կամ տարբեր աստիճանի բարդության՝ կեսարյան հատման ճանապարհով, առանց կամ որևէ միջամտությամբ տեղի ունեցող ծննդաբերությունների վարում, որոնք նաև պահանջում են լրացուցիչ այլ հետազոտություններ, ախտորոշիչ մեթոդի կիրառում և բուժում ծննդաբերության ընթացքում և հետծննդյան շրջանում՝ ներառյալ՝ արյան բաղադրիչների փոխներարկում
- Արագնթաց, ձգձգվող ծննդաբերություններ, ծննդաբերական գործունեության անոմալիաներ
- Քրոնիկ զարկերակային գերճնշում, հղիության հիպերթենզիա, թեթև և ծանր պրեէկլամպսիա
- Մանկաբարձական արյունահոսություններ առանց կամ հեմոդինամիկ խանգարումների, մակարդելիության խանգարումով, անեմիզացիայով՝ առաջադիր ընկերք, նորմալ տեղակայված ընկերքի վաղաժամ շերտազատում, ընկերքի սերտաճում, հետծննդյան ատոնիկ և հիպոտոնիկ արյունահոսություններ
- Գերջրություն/սակավաջրություն
- Բազմապտուղ հղիություն, խոշոր պտուղ կամ պտղի ներարգանդային աճի հապաղում
- Պտղի ոչ ճիշտ դրություններ՝ կոնքային, տոտիկային, միջաձիգ, անկայուն
- Պտղի դիսթրես համախտանիշ, գլուխ-կոնքային անհամապատասխանություն
- Վաղաժամ, գերհասուն կամ ժամկետանց ծննդաբերություն
- Ինքնուրույն ծննդաբերություն մեկ սպիի առայության դեպքում կամ կեսարյան հատումներ մեկ և ավելի սպիների դեպքում, արգանդի սկսվող, ոչ լրիվ կամ լրիվ պատռում
- Ռեզուս իմունիզացիա, գեստացիոն դիաբետ
- Պտղի ներարգանդային մահ, հաստատված կամ կասկածվող զարգացման արատներ և անկանոնություններ
- Վիրահատական ծննդաբերություն բնական ծննդուղիներով, միջամտություններ և վիճակներ, որոնք կարող են կիրառվել ծննդալուծման ընթացքում և ծննդաբերությունից հետո
- Ծննդաբերների մոտ առկա էքստրագենիտալ ծանր ախտաբանություններ՝ շաքարային դիաբետ, սիրտ-անոթային, միզասեռական, նյարդային, աղեստամոքսային, անոթային, արյունաստեղծ և այլ համակարգերի հիվանդություններ
- Սպեցիֆիկ ինֆեկցիաների առկայություն, ՄԻԱՎ/ՁԻԱՀ, հեպատիտներ
- Օժանդակ վերարտադրողական տեխնոլոգիաների կիրառմամբ զարգացած հղիություններ
- Ծննդաբերության ցավազրկում՝ նեյրոաքսիալ եղանակով, նարկոտիկ անալգետիկներով և այլն
Բաժանմունքում թույլատրվում է ծննդկանի ամուսնու կամ առաջին կարգի հարազատի մասնակցությունը՝ փոքրիկի լույս աշխարհ գալու պրոցեսին։
