Կանանց կոնսուլտացիայի բաժանմունքը տեղակայված է «Սուրբ Գրիգոր Լուսավորիչ» բժշկական կենտրոնի ծննդատան առաջին հարկում։
Բարձր որակավորում ունեցող մասնագետները, ժամանակակից սարքավորումներով հագեցվածությունը, ինչպես նաև բազմապրոֆիլ բժշկական կենտրոնի կազմում գործելու հնարավորություն թույլ են տալիս մատուցել լիարժեք, բարձրակարգ և որակյալ բժշկական օգնություն և սպասարկում:
Կանանց կոնսուլտացիայի բաժանմունքում մատուցվում են հետևյալ ծառայությունները․
- Հղիների հաշվառում և հսկողություն (մայրաքաղաքի բնակիչների հաշվառումն ավճար է, իսկ մարզերի և օտարերկրյա քաղաքացիները վճարովի հիմունքներով են հաշվառվում), մասնավորապես, ցածր ռիսկի հղիներ (առողջ կին, առողջ պտուղ), բարձր ռիսկի հղիներ (հղիի՝ յուրաքանչյուր զուգակցված հիվանդության և պտղի խնդիրների դեպքում)
- Կատարվում է խորհրդատվություն 1-ին և 2-րդ կարգի բուժհաստատություններում հաշվառված բարձր ռիսկի հղիներին
- Իրականացվում են ինչպե՛ս ցածր, այնպե՛ս էլ բարձր ռիսկի հղիների առաջին, երկրորդ, երրորդ եռամսյակներում սկրինինգային (պարտադիր), լաբորատոր և գործիքային հետազոտություններ,
- Կատարվում են հատուկ և դժվարամատչելի հետազոտություններ պետական պատվերի շրջանակներում, պտղի դոպլեր հետազոտություն, պտղի կարդիոտոպոգրաֆիա՝ ԿՏԳ
- Դուլաների և հոգեբանի հետ համատեղ, հղիների համար անցկացվում են «Մայրության դպրոց»-ի դասընթացներ՝ շաբաթական 5 օր, տեսապատկերով
- Կազմակերպվում է հղիի հոսպիտալացում՝ «Սուրբ Գրիգոր Լուսավորիչ» բժշկական կենտրոնի ծննդատան համապատասխան բաժանմունք, ցուցաբերվում է արագ և բարձ որակի բուժօգնություն
- Կանանց կոնսուլտացիոն բաժանմունքում հղիությունը հսկող բժշկը մասնակցում է ծննդաբերությանը և կեսարյան հատումով՝ ծննդալուծմանը։
- Կինը գտնվում է հետծննդաբերական 42 օրյա հսկողության տակ և առաջացած խնդիրների դեպքում բուժում ստանում պետական պատվերի շրջանակներում՝ անհրաժեշտ ողջ ծավալով
- Իրականացվում է թերապևտի խորհրդատվություն և բուժում
- Կատարվում է հակաբեղմնավորիչների օգտագործման խորհրդատվություն, ներարգանդային պարույրի տեղադրում և հեռացում
- Անպտուղ զույգերի հետազոտություն՝ լաբորատոր և հիստերոսալպինգոգրաֆիա (արգանդափողերի ստուգում ռենտգեն հետազոտության օգնությամբ)
- Կատարվում է գինեկոլոգ-ռեպրոդուկտոլոգի խորհրդատվություն և բուժում, անհրաժեշտության դեպքում՝ ինսեմինացիա, արտամարմնային բեղմնավորում
Կանանց կոնսուլտացիայի բաժանմունքը սպասարկում է նաև տարբեր գինեկոլոգիական գանգատների առկայության դեպքում, ինչպես նաև պրոֆիլակտիկ քննության և սոցիալական փաթեթով հետազոտման նպատակով։
Գինեկոլոգիական գանգատներով պացիենտներն անցնում են․
- Զննում գինեկոլոգիական հայելիներով
- Բիմանուալ հետազոտություն
- Ուլտրաձայնային հետազոտություն (որովայնային և հեշտոցային)
- Քսուքի քննություն
- Բջջաբանական հետազոտություն (ցիտոլոգիա)
- Կոլպոսկոպիա, անհրաժեշտության դեպքում, նշակիր բիոպսիայով
